Ymunwch ag wythnos addysgu myfyrwyr CyDA ac ymchwiliwch i’r gofynion er mwyn sicrhau bod adeiladau newydd ac adeiladau y gwnaethpwyd gwaith ôl-osod arnynt yn bodloni statws allyriadau Carbon Isel a Sero Carbon.

Trwy gyfrwng cyfres o ddarlithoedd, trafodaethau a gweithgareddau ymarferol, byddwch yn dysgu law yn llaw â’n myfyrwyr ôl-raddedig ar ein cyrsiau MSc, gan gynnwys ein cwrs Meistr mewn Adeiladu Gwyrdd.

Byddwch yn cael blas o’r profiad o astudio ar un o’n cyrsiau ôl-raddedig yn CyDA ac yn cael gwybodaeth a sgiliau hynod o werthfawr ynghylch sut y gellir cyfrifo neu fodelu trosglwyddiadau ynni mewn adeiladau a sut y gellir defnyddio hyn i optimeiddio gwaith dylunio er mwyn defnyddio ynni mewn ffordd effeithlon.

Gwybodaeth allweddol

• Hyd:  pum diwrnod
• Dyddiadau nesaf: Dydd Llun 8 Tachwedd tan Dydd Gwener 12 2025
• Amseroedd cychwyn a gorffen:  bydd yn cychwyn am 10yb ac yn gorffen am 1yp ar y diwrnod olaf
• Ffioedd:  £700
• Yn cynnwys:  hyfforddiant, yr holl ddeunyddiau, cinio
• Sylwer NAD oes llety ar gael ar hyn o bryd yn CyDA ar gyfer y cwrs hwn.  Efallai y caiff lleoedd eu rhyddhau pan fydd myfyrwyr wedi archebu eu llety ym mis Medi.
• Bydd angen:  fe’ch cynghorir i ddod ag esgidiau da a dillad sy’n dal dŵr
• Amodau a Thelerau:

  • Rhaid eich bod yn 18 oed neu’n hŷn i fynychu ein cyrsiau.
  • Cliciwch yma am restr lawn o’r amodau a thelerau

Bydd y sawl a fydd yn mynychu yn cael tystysgrif presenoldeb am ymuno â’r cwrs ar ddiwedd yr wythnos.  Os byddant yn dymuno cofrestru ar gwrs ôl-raddedig yn CyDA ac astudio’r modiwl ar eu cwrs yn y dyfodol, byddant yn gallu cael gostyngiad ar y costau dysgu. 

Cwrs ar gyfer pwy yw hwn?  

Mae’r wythnos hon ar gyfer pobl sy’n dymuno cael blas o astudio ar lefel ôl-raddedig yn CyDA, ac y maent yn dymuno cael gwybodaeth am y ffordd y gallwn sicrhau bod ein hadeiladau a’n cartrefi yn defnyddio ynni mewn ffordd fwy effeithlon.

Yr hyn y byddwch yn ei ddysgu

Mae angen lleihau cyfanswm yr ynni yr ydym yn ei ddefnyddio i wresogi cartrefi ac adeiladau yn gyflym os ydym yn mynd i leihau allyriadau gan gymdeithas mewn ffordd ddigon cyflym i ymateb i heriau yr argyfwng hinsawdd ac addasu i newidiadau amgylcheddol. 

Mae gwella effeithlonrwydd ynni mewn adeiladau newydd ac adeiladau sy’n bodoli eisoes yn rhan hanfodol o’r ymateb hwn.  Ar y cwrs byr hwn, cyflwynir cyfranogwyr i ddull gweithredu aml-ddisgyblaethol sy’n gallu cael ei ddefnyddio er mwyn arfarnu a helpu i gyfrannu at ddyluniad adeiladau.

Mae’r pynciau a ystyrir yn cynnwys: 

• Llif Ynni a Màs mewn Adeiladau 
• Gwerthusiad o berfformiad adeilad ar ôl ei ddefnyddio
• Pontydd thermol
• Màs thermol mewn adeiladau
• Ynni Solar
• Aerglosrwydd, awyru ac oeri
• Symudiad lleithder mewn ffabrig adeilad
• Lleithder perthynol, rheoli lleithder yn fewnol a byffro lleithder
• Efelychiad cyfrifiadurol o berfformiad thermol a hygrosgopig adeilad
• Adeiladau carbon isel a sero carbon, gan gynnwys Passivhaus 
• Ôl-osod – technegau, pwysigrwydd parhad, manylder
• Ôl-osod – heriau i ddefnyddwyr

Sut y byddaf yn dysgu

Trwy ddarllen ymlaen llaw a rhai darlithoedd rhagarweiniol a recordiwyd ymlaen llaw, darlithoedd byw wyneb yn wyneb, trafodaethau, gweithgareddau grŵp a gweithgareddau ymarferol yn CyDA.

Mae’r cwrs byr hwn yn rhan o’r wythnos addysgu ar gyfer modiwl Adeiladau Carbon Isel a Sero Carbon y cwrs MSc.  Dylech fod yn ymwybodol o’r ffaith y bydd rhai gweithgareddau a chynnwys yn ystod yr wythnos ar gael i fyfyrwyr yn unig efallai, a phan na fydd gweithgarwch yn briodol ar gyfer y sawl sy’n mynychu’r cwrs byr, byddwn yn ceisio trefnu gweithgarwch yn ei le.  

Cyfarfod eich tiwtor

Arweinwyr y Modiwl

Dr Ivor Davies

Mae Ivor yn addysgu ar raglen Adeiladu Gwyrdd CyDA yn bennaf, lle y mae’n arbenigo mewn dylunio cynaliadwy, perfformiad adeiladau a phopeth sy’n ymwneud â phren.  Mae Ivor yn wyddonydd ac yn dechnolegydd pren.  Mae ganddo ddiddordeb arbennig yn y ffordd y gall pren a deunyddiau cysylltiedig gyfrannu at wella perfformiad adeilad a’r economi gylchol.  Mae’n fwyaf adnabyddus am ei waith ar ddylunio a pherfformiad ffasadau pren.

Anna Poston

Mae Anna Poston yn diwtor ac yn uwch-ddarlithydd ar Raglenni Adeiladu Gwyrdd, SA, SEPDM ac SBC.  Gyda chefndir ym maes ymchwil a dylunio Pensaernïol, mae hi’n darlithio ynghylch dylunio cynaliadwy, pensaernïaeth amgylcheddol, perfformiad adeiladau a deunyddiau adeiladu cynaliadwy.

Tiwtoriaid a darlithwyr eraill

Law yn llaw ag arweinydd y modiwl a staff arbenigol yr Ysgol Graddedigion, arweinir sesiynau addysgu gan amrediad o siaradwyr gwadd a darlithwyr sy’n gweithio yn y sector ac yn y byd academaidd ar hyn o bryd, sy’n ymuno â’r myfyrwyr ar y safle neu trwy ffrydiau byw.