Ydych chi’n fyfyriwr pensaernïaeth sy’n ymwybodol o’r hinsawdd? Ymunwch â’n Hysgol Haf Pensaernïaeth yn CyDA ac archwiliwch sut y gallwn ni wneud pensaernïaeth yn wahanol, gan roi cynaliadwyedd wrth wraidd eich gwaith.

Mae Ysgol Haf Dyfodol Adfywiol yn Ysgol Raddedig yr Amgylchedd Canolfan y Dechnoleg Amgen (CyDA) yn stiwdio ddylunio creadigol fydd yn caniatáu i chi archwilio’r dirwedd ddiddorol a chydweithio â myfyrwyr pensaernïaeth eraill.

Byddwch yn cael y cyfle i ddysgu gan arbenigwyr sy’n addysgu ar ein cwrs Meistr mewn Pensaernïaeth Gynaliadwy (ARB Rhan 2), gweld gwaith sydd ar y gweill yn uniongyrchol, a datblygu syniadau dylunio moesol, a allai gynnwys archwilio’r biosffer, cymunedau gwledig, aneddiadau dynol bregus, deunyddiau naturiol, atafaelu carbon, addasu i’r hinsawdd, tirlunio/creu lleoedd yn seiliedig ar natur ac adfywio ecolegol.

Gwybodaeth allweddol

• Hyd: pum diwrnod 
• Dyddiadau ar ddod: Dydd Llun 13 – Dydd Gwener 17 Gorffennaf 
• Amseroedd cychwyn a gorffen: yn dechrau am 4yp ac yn gorffen am 3.30yp ar y diwrnod olaf 
• Ffioedd: £298 
• Yn cynnwys: ffioedd dysgu, yr holl ddeunyddiau, prydau bwyd 
• Gellir archebu llety yn CyDA ar wahân am £148 ychwanegol. Mae maes gwersylla gerllaw hefyd, neu gellir dod o hyd i lety arall gerllaw ym Machynlleth neu Corris. 
• Beth i’w ddod gyda chi: Llyfr braslunio, camerâu a gliniaduron. Argymhellir esgidiau da a dillad gwrth-ddŵr 
• Telerau ac Amodau: 

  • Rhaid i chi fod yn 18 oed neu’n hŷn i fynychu ein cyrsiau. 
  • Am restr lawn o delerau ac amodau cliciwch yma 

At bwy mae’r cwrs hwn wedi’i anelu?

Mae’r rhaglen breswyl fer hon wedi’i chynllunio i ddod â myfyrwyr israddedig pensaernïaeth a’r amgylchedd adeiledig sy’n ymwybodol o’r hinsawdd o bob cwr o’r DU at eu gilydd i weithio ochr yn ochr â’i gilydd yng nghyffiniau prydferth safle CyDA, i archwilio eich diddordebau a’ch dyfodol, ac i ddysgu oddi wrth eich gilydd mewn gweithdy egnïol, cefnogol a chynhwysol.

Gwneud Pensaernïaeth y wahanol

Cenhadaeth CyDA yw ysbrydoli, hysbysu a galluogi dynoliaeth i ymateb i’r argyfwng hinsawdd a bioamrywiaeth. Mae cynaliadwyedd wrth wraidd yr ysgol haf bensaernïaeth ac mae’n dilyn ethos CyDA i archwilio sut y gallwn feddwl yn wahanol, i herio’r ffyrdd rydym yn gwneud pensaernïaeth, nid yn unig i leihau ein heffaith ond hefyd i gyfrannu at greu byd cynaliadwy, adfywiol a llewyrchus. 
 

Wedi’i leoli ym Miosffer Dyfi, 5 milltir o Fachynlleth, mae gan safle CyDA lawer o enghreifftiau o adeiladau gwyrdd arbrofol a gynlluniwyd gyda deunyddiau cynaliadwy, ymhlith coetiroedd a reolir yn gynaliadwy, gerddi organig, ac enghreifftiau o ynni adnewyddadwy. 
 

Mae Biosffer Dyfi yn safle yng Nghanolbarth Cymru wedi’i ddynodi yn safle UNESCO. Mae’n dirwedd arwyddocaol lle mae pobl yn ymgysylltu’n weithredol â materion bioamrywiaeth a chynaliadwyedd. Mae’r tirweddau yn y rhan hon o Ganolbarth Cymru yn cynnwys rhostir mawn uchel, ffermio a choedwigaeth iseldir yn ogystal ag aber llydan, twyni tywod a thraethau, ac yn cynnwys bywyd gwyllt coetir llydanddail (y fforest law Geltaidd), coedwig gonifferaidd, ffermdir, morfa heli a cors mawr ar yr iseldir; hafan i fywyd gwyllt. 
 

Bydd yr ysgol haf yn cynnwys diwrnod llawn yn archwilio’r rhanbarth yn cwrdd â phobl leol, ymchwilio i’r dirwedd naturiol o’r mynyddoedd i’r môr, gweld a  meddwl yn wahanol am ein cyfrifoldebau fel ceidwaid diwylliant a lle. O’r cychwyn cyntaf gofynnir i chi weithio ar y cyd i ailddychmygu senarios y dyfodol a datblygu ymyriadau pensaernïol ac amgylcheddol sydd ar yr un pryd yn iach ac yn ymgodi gobeithion, yn mynd i’r afael â materion brys newid hinsawdd a bioamrywiaeth, ac yn cefnogi cymunedau ffyniannus. 
 

Bydd yr wythnos yn cynnwys sgyrsiau allweddol ar Brydain Ddi-garbon, meddwl systemau, cyfranogiad, cydweithio, arferiadau sy’n ymgysylltu a chymdeithas, gwerth cymdeithasol mewn dylunio sy’n seiliedig ar leoedd a fframweithiau ar gyfer meddwl yn y dyfodol. 
 

Gyda’ch gilydd byddwch yn datblygu ymatebion dychmygus i’ch archwiliadau ym Miosffer Dyfi gan arwain at arddangosfa a dathliad o’ch ymdrechion ar y cyd. 

Tiwtoriaid

Dr Carl Meddings

Carl yw Arweinydd y Rhaglen ar gyfer y radd M.Arch mewn Pensaernïaeth Gynaliadwy. Mae’n bensaer ac addysgwr sy’n canolbwyntio ar ddylunio’n gynaliadwy ac adfywiol. Gan dynnu ar ymarfer proffesiynol a dros ddau ddegawd o addysgu, mae ei waith yn pwysleisio dysgu myfyriol, meddwl systemau, a grymuso myfyrwyr i ddychmygu pensaernïaeth sy’n adfer lles ecolegol a chymdeithasol yn weithredol yn ein hamgylcheddau diwylliannol a phroffesiynol sy’n newid yn gyflym. 

Zoë Quick

Mae ymarfer pensaernïol, ymchwil ac addysgu Zoë yn symud rhwng pensaernïaeth, celf, barddoniaeth a pherfformiad, gyda ffocws ar greu perthnasoedd gwydn rhwng archifau, cymunedau ac ecolegau. Fel darlithydd rheolaidd yn CyDA, mae hi’n dod â phrofiad cyfoethog o arwain timau amlddisgyblaethol wrth gyflwyno prosiectau dylunio naratif ar gyfer sefydliadau diwylliannol a thirweddau. 

Owen Griffiths

Mae Owen Griffiths yn artist, arweinydd gweithdai a hwylusydd. Gan ddefnyddio prosesau cyfranogol a chydweithredol, mae ei ymarfer yn ymgysylltu’n gymdeithasol drwy archwilio posibiliadau mae celf yn ei gynnig i greu fframweithiau, adnoddau a systemau newydd. Mae hyn yn cymryd sawl ffurf, ond mae’n cynnwys adennill ac ailfeddwl digwyddiadau, defodau a mannau deialog trwy greu gerddi, cyd-ddylunio lleoedd, a gwneud gwleddoedd, gan archwilio themâu o amgylch yr hinsawdd, tirwedd, trefoldeb, cyfiawnder cymdeithasol a systemau bwyd ar yr un pryd.