Ed Parson

Mae Ed wedi byw yng Nghymru ers astudio Polisi Cymdeithasol ym Mhrifysgol Caerdydd. Datblygodd ddiddordeb ymchwil arbennig mewn troseddau cefn gwlad  ac arwahanrwydd cymdeithasol, a chafodd ei ysbrydoli gan ei brofiad o ddelio ag ymddygiad gwrthgymdeithasol, megis tipio anghyfreithlon, i edrych ar sut i fynd i’r afael â phroblemau o’r fath yn ystod ei ddiploma ôl-raddedig mewn Rheoli Cefn Gwlad ym Mhrifysgol Bangor. Fel rhan o’r cwrs hwn teithiodd ar ei liwt ei hunan i Andes Perw am fis i astudio effaith eco-dwristiaeth mewn dwy gymuned anghysbell.

Mae ganddo brofiad ymarferol helaeth o weithio mewn amgylchedd canolfan ymwelwyr prysur ynghyd â’r heriau o reoli mynediad ac adloniant ar draws ystâd fawr. Yn ystod ei yrfa gyda Dŵr Cymru datblygodd y timau a’r cyfleusterau yn Llyn Brenig a Chwm Elan drwy ganolbwyntio ar dueddiadau’r farchnad a manteisio ar asedau’r ddau safle. Arweiniodd hyn at brofiad ymwelwyr llawer gwell ynghyd â chynnydd yn nifer yr ymwelwyr ac incwm. Dechreuodd agor trwy gydol y flwyddyn a datblygodd raglen flynyddol o ddigwyddiadau gan gynyddu nifer yr ymwelwyr i 200,000.  Bu’n gyfrifol am hyrwyddo Cwm Elan fel lleoliad ffilmio, gan sicrhau cytundebau gwerthfawr gydag Universal Pictures, The Huntsman: Winter’s War, Top Gear a’r dramâu, The Game ar gyfer BBC a’r Gwyll (Hinterland) ar gyfer S4C. Gweithiodd hefyd i Jaguar Land Rover, a groesawodd 900 o newyddiadurwyr i ginio ym Melin Lifio Elan yn 2013 ar gyfer lansiad byd-eang y Range Rover Sport newydd. Creodd leoliad priodasau newydd ac unigryw ar dwr canol argae Pen y Garreg a chroesawodd dderbyniadau priodas i’r felin lifio hanesyddol.

Mae Ed yn mwynhau datblygu partneriaethau sy’n arwain at gyflawni mwy. Aeth ati’n frwd i ddatblygu Partneriaeth Tirlun Cwm Elan sydd, ar ôl 4 blynedd a nifer o heriau ac anawsterau, wedi llwyddo i sicrhau £1.6 miliwn gan y Loteri Genedlaethol ar gyfer Elan Links, prosiect Gwarchod Treftadaeth Tirlun. Pan oedd yng Nghwm Elan, cadeiriodd Rhwydwaith Twristiaeth Mynyddoedd Cambria mewn partneriaeth ag Ymweld â Chymru, arweiniodd ar ddatblygu’r gyrchfan, sicrhaodd grant ar gyfer rôl ran-amser â thâl i hwyluso digwyddiadau ymgysylltu, a rheolodd y gwaith o gyflwyno’r cynllun gweithredu cyrchfan.

Y tu allan i’r gwaith mae Ed yn mwynhau archwilio lleoliadau diarffordd, cerdded, dringo a chanŵio. Mae hefyd yn dwlu gweithio â phren – o brosiectau adeiladu mawr a cherfio â llif gadwyn i waith mwy cywrain megis gwneud teganau ar gyfer ei ddwy ferch.