english
CYSYLLTU Â NI
Open Menu Close Menu
Gyfrifydd Rheoli

Gyfrifydd Rheoli

Ionawr 21, 2025
Home » Gyfrifydd Rheoli

Mae CyDA yn chwilio am Gyfrifydd Rheoli i gydweithio’n agos gyda’r Cyfarwyddwr Cyllid a Gweithrediadau a’r Cyd-Prif Swyddog Gweithredol i fonitro, cynnal a datblygu systemau a rheolaethau ariannol CyDA.

Ynghylch CyDA

Mae Canolfan y Dechnoleg Amgen (CyDA) yn elusen amgylcheddol ac addysgiadol  rhyngwladol enwog, yn ganolfan eco sy’n arwain y byd ac yn un o brif ddarparwyr addysg amgylcheddol ôl-raddedig yn y DU, sydd wedi’i lleoli ger Machynlleth ym Mhowys, Canolbarth Cymru.

Mae CyDA yn darparu ysbrydoliaeth, addysg a hyfforddiant ar atebion i’r argyfwng hinsawdd a bioamrywiaeth.

Mae’r prif weithgareddau’n cynnwys canolfan ymwelwyr lle gall grwpiau weld yr atebion hyn ar waith, cyrsiau preswyl byr, hyfforddiant galwedigaethol a graddau ôl-raddedig mewn ystod eang o bynciau’n ymwneud a chynaladwyedd. Cynigir cyrsiau a digwyddiadau ar-lein ochr yn ochr â dysgu wyneb-yn-wyneb.

Manylion y Swydd

  • Cyfeirnod: MAOF250114
  • Maes Cyfrifoldeb: Cyllid, Cyfrifon statduol ac Archwilio a Gwybodaeth Reoli
  • Atebol i: Cyfarwyddwr Cyllid a Gweithrediadau a/neu’r Cyd-Prif Swyddog Gweithredol
  • Math o gontract: Cyfnod penodol – Dwy flynedd
  • Cyfrifol am: Rheolwr Cyllid a’r Tîm, gan gynnwys cyfrifoldeb a rennir am Gyllid Myfyrwyr
  • Lleoliad: Hyblyg gydag ymweliadau rheolaidd â chanolfan eco CAT ger Machynlleth
  • Oriau: 37.5 awr yr wythnos. (1.0 FTE)
  • Diwrnodau gweithio: Fel rheol, dydd Llun i ddydd Gwener, 9am i 5pm. Penwythnosau a nosweithiau o bryd i’w gilydd.
  • Gweithio o bell: Gweler Lleoliad
  • Dedlein ar gyfer derbyn ceisiadau: 9yb 13 Chwefror 2025
  • Cynhelir cyfweliadau: Wythnos yn dechrau 21 Chwefror 2025 (ar safle)
  • Dyddiad cychwyn disgwyliedig: Cyn gynted ag sy’n bosib

Cyflog a buddion gweithiwr

£35,898 y flwyddyn

Mae Canolfan y Dechnoleg Amgen (CAT) yn cynnig lwfans gwyliau blynyddol hael o 25 diwrnod y flwyddyn, yn ogystal â gwyliau banc (9-10 diwrnod fel arfer), a lwfans ychwanegol adeg y Nadolig (3 diwrnod fel arfer), yn ogystal ag 1 diwrnod ychwanegol am bob blwyddyn a weithir (hyd at 5 diwrnod).

  • Mae CAT hefyd yn cynnig pecyn deniadol o fuddion i weithwyr, gan gynnwys:
  • Cinio poeth am ddim a diodydd poeth am ddim o’r caffi pryd bynnag y byddwch yn gweithio o ganolfan eco CAT;
  • Gostyngiad o 40% ar nwyddau manwerthu a brynir oddi wrth CAT;
  • Cyfleoedd ar gyfer hyfforddiant DPP, cymwysterau ac aelodaeth broffesiynol i’w hariannu gan CAT;
  • Cyfle i ddilyn 2 gwrs byr CAT y flwyddyn yn rhad ac am ddim;
  • Y cyfle i brynu diwrnodau gwyliau ychwanegol;
  • Cynllun ‘Seiclo i’r Gwaith’ (wedi’i gynllunio);
  • Cyfraniad pensiwn o 5%;
  • Hawliad mamolaeth a thadolaeth hael a budd-dal marw yn y swydd;
  • 2 awr y mis ar gyfer iechyd a lles cyffredinol a 2 awr y mis ar gyfer hyfforddiant yn y Gymraeg.

Trosolwg o’r Swydd

Mae’r rôl hon yn rhan allweddol o’r tîm cyllid yn CYDA wrth i’r sefydliad dyfu a cheisio cynllunio ar gyfer y dyfodol. Bydd yn adrodd i’r Cyfarwyddwr Cyllid a Gweithrediadau (DOFO) a/neu’r Cyd-Prif Swyddog Gweithredol, gyda chyfrifoldeb rheolwr llinell am y Rheolwr Cyllid a’r tîm cyllid.

Bydd meysydd allweddol y rôl yn cynnwys: gweithio gyda’r DOFO i ddatblygu gwybodaeth rheoli ac adrodd; cynhyrchu adroddiadau misol ar gyfer yr uwch dîm rheoli; cynhyrchu adroddiadau ar gyfer Bwrdd yr Ymddiriedolwyr; rhagolygon ariannol a chyllidebu; gosod targedau; ehangu defnydd ac effeithlonrwydd ein meddalwedd cyfrifon, gan gynnwys ei hintegreiddio â systemau eraill, paratoi a chyflwyno ffurflenni TAW chwarterol a goruchwylio cynhyrchu ein cyflogres fisol.

Mae’r rôl yn cynnwys cyfrifoldebau rheolwr llinell ar gyfer y tîm cyllid a chyfrifoldebau rheoli a rennir ar gyfer y tîm cyllid myfyrwyr.

Bydd y rôl yn adrodd i’r Cyfarwyddwr Cyllid a Gweithrediadau a/neu’r Prif Swyddog Gweithredol, a bydd yn cynnwys gweithio’n agos gyda nhw i fonitro, cynnal a datblygu systemau a rheolaethau ariannol CyDA.

Yn ogystal, bydd y rôl yn cynnwys gweithio gyda’r tîm cyllid i gynhyrchu’r cyfrifon blynyddol statudol, paratoi ein harchwiliad blynyddol a chydgysylltu â’r archwilwyr ynghylch eu gwaith, gan sicrhau bod yr holl derfynau adrodd (mewnol ac allanol) yn cael eu bodloni.

Mae’r rôl hon yn ddelfrydol ar gyfer rhywun a fyddai’n dymuno defnyddio eu sgiliau a’u profiad cyfrifyddu fel rhan o dîm ymroddedig sy’n cydweithio ar atebion i’r argyfwng hinsawdd a bioamrywiaeth.

Bydd gan yr ymgeisydd delfrydol 2-3 blynedd o brofiad ôl-gymhwyso mewn rôl debyg gydag elusen neu sefydliad dielw arall, a bydd ganddynt sgiliau TG a chyfathrebu (ar lafar ac yn ysgrifenedig) cadarn.

Prif Gyfrifoldebau

Maes 1: Gwybodaeth rheoli

  • Rheolwr llinell y tîm cyllid
  • Monitro systemau cadw cyfrifon a chyfrifyddu i sicrhau bod gwybodaeth yn cael ei chynhyrchu’n amserol ac yn gywir
  • Cynhyrchu adroddiadau rheoli misol
  • Cynorthwyo gyda chynhyrchu Dangosyddion Perfformiad Allweddol (DPA)
  • Cynorthywo gyda chynhyrchu a dehongli adroddiadau amrywiant
  • Cynorthwyo gyda dehongli gwybodaeth ariannol a rheoli, gan gynnwys adnabod tueddiadau allweddol
  • Cynorthwyo gyda datblygu a gwella adroddiadau rheoli
  • Cynorthwyo’r DOFO i gynhyrchu adroddiadau ar gyfer Bwrdd yr Ymddiredolwyr

Maes 2: Systemau a Rheolaethau

  • Sicrhau bod systemau a rheolaethau cyfrifyddu yn gweithredu’n effeithlon ac yn cael eu dilyn
  • Cynorthwyo i ddatblygu a gwella systemau a rheolaethau cyfrifyddu
  • Cynorthwyo i orfodi a datblygu ein rheoliadau ariannol yn barhaus

Maes 3: Cyflogres

  • Sicrhau bod y gyflogres fisol yn cael ei pharatoi yn gywir ac ar amser
  • Sicrhau bod ffurflenni a thaliadau TWE/YG yn cael eu cwblhau’n gywir ac ar amser

Maes 4: TAW

  • Paratoi’r ffurflenni TAW chwarterol
  • Sicrhau bod ffurflenni TAW yn cael eu cyflwyno’n gywir ac ar amser
  • Sicrhau bod unrhyw daliadau TAW sy’n ddyledus i CThEM yn cael ei gwneud yn amserol
  • Ymdrin ag ymholiadau ad hoc ynghylch cydymffurfiaeth TAW o fewn CyDA

Maes 5: Rhagolygon ariannol

  • Cynorthwyo’r DOFO i gynhyrchu a diweddaru rhagolygon ariannol cyfnodol
  • Cynorthwyo’r DOFO i gynhyrchu esboniadau am y rhagolygon

Maes 6: Cyllidebu a Gosod Targedau

  • Cynhyrchu cyllidebau blynyddol ar gyfer y sefydliad ac adrannau unigol, gan gysylltu gyda rheolwyr adrannol i sicrhau bod cyllidebau yn realistig ac yn ddealladwy
  • Monitro cyllidebau yn ystod y flwyddyn
  • Adrodd ynghylch amrywiannau
  • Adolygu’r defnydd arfaethedig o’n meddalwedd cyfrifon ar gyfer cofnodi ac adrodd ar gyllidebau
  • Gosod targedau adrannol
  • Monitro ac adrodd ar ffigyrau gwirioneddol yn erbyn y targedau

Maes 7: Cyllid Myfyrwyr

  • Cynorthwyo i reoli’r agweddau o rolau’r Tîm Cyllid Myfyrwyr sy’n ymwneud yn uniongyrchol â chyllid a chyfrifyddu CyDA
  • Cysylltu gyda’r Tîm Cymorth Myfyrwyr a’r Ysgol Graddedigion ehangach mewn perthynas â materion ariannol

Maes 8: Cyfrifoldebau Eraill

  • Aseiniadau ad hoc yn ymwneud â materion ariannol
  • Ymdrin â materion treth a all godi gan sicrhau bod CyDA yn parhau i gydymffurfio â’r holl ofynion statudol
  • Cynorthwyo gydag unrhyw ymweliadau’n ymwneud â chydymffurfio megis archwiliadau CThEM, TAW a TWE
  • Cynorthwyo’r DOFO mewn perthynas â threfniadau bancio CyDA
  • Mynychu cyfarfodydd ar draws CyDA i drafod materion cyllid a chynorthwyo gyda chynllunio
  • Dyletswyddau eraill y gellid yn rhesymol ofyn amdanynt sy’n ymwneud â materion ariannol a chyfrifyddu, ond nid o reidrwydd yn gyfyngedig iddynt.

Unrhyw ddyletswyddau eraill y cytunwyd arnynt gyda’r Cyd-Brif Swyddog Gweithredol

I ddysgu mwy am y rôl, lawrlwythwch y disgrifiad swydd llawn:

Dylid anfon ceisiadau i vacancy@cat.org.uk erbyn y dedlein gan nodi teitl y swydd yn y blwch Testun.

Dylid cyfeirio ymholiadau at vacancy@cat.org.uk

Rhaid llenwi ffurflen gais, ni dderbynnir CV.

Swydd Disgrifiad: Cyfrifydd Rheoli

Darllenwch y dogfennau isod cyn cwblhau’ch cais: