Cynhadledd Flynyddol CYDA

Ymunwch â’n Cynhadledd CyDA flynyddol i fwynhau anerchiadau a gweithdai a fydd yn archwilio’r sgiliau a’r wybodaeth sy’n angenrheidiol er mwyn gweithredu i sicrhau dyfodol iachach, tecach a mwy diogel.  Treuliwch benwythnos yn ein canolfan eco hyfryd ym mis Awst 2025, gan ffurfio cysylltiadau newydd a phobl o’r un natur.

Dewch â’ch sgiliau, eich syniadau a’ch profiad i Gynhadledd yr haf arbennig CYDA, gan gymryd rhan mewn penwythnos o ddysgu gyda’n gilydd, fel cymuned, er mwyn mynd i’r afael â’r argyfwng hinsawdd a natur.

Gallwch archebu eich lle nawr, a byddwn yn cyhoeddi uchafbwyntiau cyntaf y rhaglen yn gynnar yn 2025.

Uchafbwyntiau’r Rhaglen

• Daliwch fyny â chwmni ynni adnewyddadwy arloesol Dulas a ddeilliodd yn CyDA i glywed sut mae eu hoergelloedd brechu yn parhau i achub bywydau ledled y byd – gyda Rheolwr-gyfarwyddwr Gweithredol Dulas (ac un o raddedigion CyDA) Ruth Chapman a’i chydweithiwr Catherine McLennan, Arweinydd Masnach.
• “Pa dda yw gwyddoniaeth a thybiaeth resymegol os nad oes neb yn talu sylw?” yw cwestiwn ein siaradwr gwadd arbennig Syr Jonathon Porritt, awdur ac amgylcheddwr. Clywch am ei lyfr nesaf, ‘Love, Anger & Betrayal’, a gyd-greodd gyda 26 o actifyddion hinsawdd ifanc i droi sylw i’r argyfwng rydym ni gyd yn ei rannu, wrth iddynt frwydro am ddyfodol mwy diogel.
• Cewch eich arwain gan y darlithydd gwadd Jean Boulton ar y grefft o ‘feddwl yn fawr a gweithredu’n fach’. Myfyriwch ar sut y gallwn weithio i greu gwytnwch lleol, gan ystyried newidiadau byd-eang mawr, polisi cyhoeddus cenedlaethol, yn ogystal â’r hyn a wnawn yn lleol.
• Trowch law at ddefnyddio deunyddiau adeiladu cynaliadwy mewn gweithdy Adeiladu gyda Phridd wedi ei redeg gan geidwad deunyddiau cynaliadwy CyDA.
• Ymunwch â thaith ymarferol drwy Coed Gwern -coedwig CyDA, ac ymgollwch mewn archwilio rheoli coetir. Dysgwch am fioamrywiaeth, cadwraeth, cynnwys cymunedau yn ogystal â monitro bywyd gwyllt, a chynyddu gwerth coetiroedd.
• Cymrwch ran mewn taith arweiniol o uned cynhwysydd pŵer solar newydd CyDA sydd mewn lle ar gyfer cerbydau trydan ac yn storio 50kw-awr o drydan, fe’i sefydlwyd mewn partneriaeth â chwmni Bro Dyfi Renewables a Dulas. Dysgwch sut mae’n cefnogi Cenhadaeth Ynni Cymru i rymuso cymunedau Cymru drwy ynni adnewyddadwy sy’n eiddo i bobl leol, a hyrwyddo datrysiadau wedi’i arwain gan gymunedau, am Gymru wyrddach, fwy hunan-cynaliadwy yn uniongyrchol o ganolfan eco CyDA.
• Ymunwch â sesiwn cwestiwn ac ateb gyda rhai o raddedigion ysbrydoledig CyDA sydd wedi’u hyfforddi gyda’r sgiliau a’r wybodaeth i greu newid ar draws amrywiaeth o ddiwydiannau – o adeiladu gwyrdd, i bensaernïaeth a chyfathrebu ynghylch newid Hinsawdd.
• Bwyd llysieuol tymhorol, cerddoriaeth fyw, amgylchedd cwmpasol hardd a naturiol, a Ceilidh nos Sadwrn.

Bydd mwy o wybodaeth am y rhaglen ar gael cyn bo hir – cadwch lygad ar y dudalen hon am ddiweddariadau pellach.

Archebu

I fynychu Cynhadledd flynyddol CYDA, rhaid eich bod yn aelod o CYDA. Os nad ydych eisoes yn aelod, gallwch ychwanegu aelodaeth i’ch archeb wrth i chi brynu eich tocyn.

Gallwn gynnig dewis o brisiau tocynnau, gan ddibynnu a ydych chi’n teimlo y gallwch gefnogi CYDA ar yr adeg hon, i’r rhai y bydd angen tocyn consesiynol arnynt, ac ar gyfer myfyrwyr CYDA. Anogwn breswylwyr lleol a’r rhai ar incwm isel i fanteisio ar y tocyn consesiynol a gynigir.

Llety

Mae llety ar ein safle yn yr adeilad WISE wedi gwerthu allan ar hyn o bryd.

Mae nifer o opsiynau llety ar gael yn yr ardal leol. Yn ystod misoedd cynhesach, mae llawer o fyfyrwyr ac ymwelwyr yn dewis gwersylla mewn maes gwersylla cyfagos sy’n fforddiadwy ac wedi’i leoli ychydig gannoedd o fetrau o safle CyDA.