Gwirfoddolwyr oedd yn gyfrifol am ddechrau CyDA dros 50 mlynedd yn ôl. Heddiw maen nhw’n dal i fod yn rhan amhrisiadwy o deulu CyDA.

Mae ein gwirfoddolwyr yn ein helpu i reoli’r safle drwy gydol y flwyddyn, gan gyfrannu at gynnal a chadw ein gerddi a’n coetiroedd a rhoi help llaw mewn meysydd allweddol eraill.
Mae gwirfoddoli gyda ni yn gyfle gwych i fagu sgiliau newydd a phrofiad gwaith, i archwilio’r ardal hardd hon yng Nghanolbarth Cymru a Pharc Cenedlaethol Eryri ac i gwrdd ag amrywiaeth o bobl newydd ddiddorol a chyfeillgar – i gyd yn gweithio gyda’i gilydd ar atebion i’r argyfwng hinsawdd a bioamrywiaeth.

Mae sawl ffordd wahanol o wirfoddoli

Rydyn ni’n cynnig amrywiaeth o gyfleoedd gwirfoddoli gwahanol:

• Swyddi gwirfoddoli chwe mis preswyl, yn aros ar safle CyDA.
• Gwirfoddoli am gyfnodau byrrach os ydych yn byw’n lleol neu’n gallu trefnu eich llety eich hun.
• Diwrnodau gwirfoddoli rheolaidd, er enghraifft ymuno â ni am ddiwrnod bob wythnos.

Gweithio fel gwirfoddolwr

Mae’r rhan fwyaf o’n gwirfoddolwyr yn ymuno â’r Adran Ystadau, gan weithio yn ein timau Gerddi neu Goetir a Dŵr. Gallwch ddarllen mwy am y rolau hyn isod.

Serch hynny, os oes gennych sgiliau eraill yr hoffech eu cynnig i CyDA, byddem yn falch iawn o ystyried ceisiadau ar gyfer meysydd eraill. Er enghraifft, mae cyn wirfoddolwyr wedi helpu gyda chyfryngau digidol, marchnata, codi arian, ymgysylltu ag ymwelwyr, archebion drwy’r post a chyrsiau byr.